رين الميلع - هنا سورية

ساحة الأمويين
ساحة الأمويين

ع الجامعة ؟ ع الشغل ؟؟ .. أو مشوار مع الرفقات ... لازم تهكلي هم الطريق ازا مافي مين يوصلك قدامك خيارين باص أو تكسي .. وأحلاهما مر , الباص ممكن يتأخر وتنطري بس بدون ملل , أكيد الشباب الطيبة ما بيحسسوكي بالوحدة والرايح والجاي بيتحركش فيكي وبس يجي الباص هون بقا بتبدا الاحتفالات بعيد المغناطيس العالمي , بتصيري تحسي حالك مغناطيس متعدد الأقطاب بيجذب كل شي الكبير والزغير واللي معو كتب واللي راجع من الورشة واللي "مواهبو" ظاهرة واللي مخباية .. وحالة بتبدا من التدفيش عالطلعة ... لوقت التدفيش بالنزلة ... وبين التدفيشين بيشتغل المغناطيس .. والتجاذب "قوي" .. ومهم .. و"شديد" وتماما متل الاحساس المرافق "قوي" .. "شديد" بس أكيد مانو مهم ... ومتل بطل المشهد "شديد" و "بيرفع" المشاهدات ..للمشهد ! مغناطيسك كمان عزيزتي ممكن يجبلك رقم تلفون أي حدا .. بمجرد انو تطلبي من اي حدا يقعدك مكانو أو ازا حدا قام وقلك تعي اقعدي .. رقم التلفون والتعارف بيصير "روتين".. هلق بالتاكسي الوضع مختلف , المغناطيس بيشتغل من أول تطليعة بالمراية .. ويا ما أكتر الأحاديث يللي ممكن تنفتح عالطريق ..والاغاني اللي بتنحط .. والضيافة اللي بتتقدم .. دايسة "عروستو" انتي مو حيالله .. انو مثلا ما بيكفي النطرة عالطرقات والحواجز والمواصلات العظيمة اللي عنا , كمان لازم تتحفونا بمواهبكن التلطيشية ؟ وقدراتكن التجاذبية ؟ ارحموا من في الارض لك أمي .. ارحمونا من افلام الاكشن تبع توم كروز .. وقت يجي "توم كروز" وحياتكن ما منقصر .. وأكشنهاااااا .

اترك تعليق: التعليقات تمثل أصحابها ولا تمثل `هنا سورية` بالضرورة.