رين الميلع - هنا سورية

أطباء الأسنان "مو" أطباء ... عزيزي وزير الصحة
أطباء الأسنان "مو" أطباء ... عزيزي وزير الصحة

عزيزي وزير الصحة :

بعرف عندك شغل كتير , واجتماعات أكتر وبفهم انو مانك عم تقدر تتابع الأخبار , وتعرف شو عم يصير بالبلد ...لهيك حبيت خبرك كم شغلة , يعني هنن مو كتير مهمين قد المرسوم الجديد يللي عم تشتغل عليه بس انو .. يعني ... مهمين

سيادتك نحنا بالبلد عنا 60% من المشافي ويمكن أكتر صاروا خارج الخدمة يا مدمرين يا معطلين يا قاعدين فيون "المسلحين" , شلل الأطفال رجع لعنا مع انو كنا مقلعينو من سنين كتار , العمليات بالمشافي تلت رباعا عم تصير بلا تخدير لأن مافي مخدر .. حتى الأوكسجين  يا دوب عم يكفي ,وأسماء الأوبئة والامراض الجديدة حدث ولا حرج , أما ازا بدي احكيلك عن الأدوية ... بقا وحياة سيادتك مابعرف من وين بدي بلش .. احكيلك عن الادوية الناقصة ولا المفقودة ولا اللي ازا انلقت سعرا بالعاااااالي .. احكيلك عن الناس الناطرة عالبواب , ولا المشوهة بالطرقات ؟
وشو بدي احكي لاحكي .. سيادتك بعرف انو مرسومنا الطبي عمرو اربعين سنة وصار لازم يتعدل .. بس يمكن في كتييير اشيا بواقعنا الطبي صعبة وبدا شغل , ومهمة ... اهم من انك تسحب لقب الطبيب من اطبا السنان .. يللي هنن يادوب ملاقيين شغل من بعد ما نسيت الناس كيف تضحك ويبانو سنانون ...

اترك تعليق: التعليقات تمثل أصحابها ولا تمثل `هنا سورية` بالضرورة.