ادونيس عصام شدود

الاعلام الرسمي السوري .. يستثمر " الحمام الزاجل " في نقل الخبر ..
الاعلام الرسمي السوري .. يستثمر " الحمام الزاجل " في نقل الخبر ..

" الخبر " .. تعادل المنتخب الأولمبي السوري مع المنتخب الاماراتي بأول مباراة ببطولة كأس اسيا تحت 22 سنة , واللي عم تنلعب بالعاصمة العمانية مسقط ..

" التوقيت والتاريخ " .. بلشت المباراة و صفّر الحكم الساعة 6 المسا بتوقيت دمشق وهالحكي صار مبارح السبت والتاريخ بالروزنامة .. 11-1-2014 ، وخلصت اللعبة الساعة 8 إلا شوي .. كمان المسا ..

" التعامل الإعلامي السوري الرسمي مع المناسبة ".. الموقع الرسمي للاتحاد الرياضي العام السوري ، نشرلو الخبر المنسق الإعلامي للمنتخب بعد ما خلصوا اللعيبة لعب بـ 8 ساعات ونص ، وهالحكي الساعة 4 ونص " الفجر"  أو متل ما بقولوا بعد منتصف الليل ..

سانا وما أدراكم ما سانا .. " وكالة الأنباء السورية " .. كانت الأسرع بالتضواية عالنتيجة .. بحكم إنو هاد هو المنتخب الوطني اللي بمثل البلاد  " بهالمحفل الآسيوي " وصارت التضواية بعد سبع ساعات من صفارة نهاية المباراة يعني الساعة 3 ، كمان " الفجر "  ..

" توثيق الخبر " .. كانت في عملية تشاركية فظيعة بين الموقع الرسمي للاتحاد الرياضي العام و " وكالة أنباء البلاد " .. الاتنين نشروا 4 صور .. ما في غيرن .. متاخدين من اللقاء ، وحرج على الاتنين ، يعرضوا فيديو ، مع انو المباراة كانت منقولة عأكتر من محطة ، إلا المحطات السورية طبعا ، وأهم شي ، لازم اللي عم يقرا هالحكي يتناسى ويتجاهل ويغض نظر، عن إنو في منسق اعلامي ضمن بعثة المنتخب اللي طارت إلى عمان ..

كل شي انحكى ، " تفاصيل صغيرة " ، ما إلها معنى ، أصلا في كم واحد  .. " مو أكثر " ، من اللي بحبوا يتابعوا أخبار مشاركة منتخبن بالبطولة القارية ، " كتروا غلبة " ، واهتموا بهالتفاصيل .

اترك تعليق: التعليقات تمثل أصحابها ولا تمثل `هنا سورية` بالضرورة.