وسام إبراهيم - هنا سورية

كلمات على وزن الوطن
كلمات على وزن الوطن

بدي وطن أبيض

متل التلج .. متل الكفن

بدي وطن

بدي خبر..

لا عن قصور مسوّرة

ولا عن ديار مدمرة

لا عن عمر أو حيدرة

بدي صور..

لا عن نزوح ولا سفر

أو موت يفتك بالبشر

ولا فيها "شكراً قطر !"

بدي وطن..

متلي "غبي"

يجهل روايات الفتن

أُميّ بتواريخ العفن

حدودو بقبرص أو عدن

مش هم أنثى أو صبي

بدي وطن..

رغم التعب

يضحك على أهون سبب

"حمرا طويلة" يولّعا

يرندح ع حنّات القصب

متة بشاي ينقعا

غافي عند صوبة حطب

بدي بلد ..

بدي ع مقعد مدرسة

اكتب حروف مهندسة

ارجع ولد

غنّي وطن

مش همّ ان غنيتو بنوطة

مش همّ إذا بكتب اسمو

بختم بـ "الألف الممدودة"

أو بنهي بـ "تاء المربوطة"

اترك تعليق: التعليقات تمثل أصحابها ولا تمثل `هنا سورية` بالضرورة.