سفيان عبد المعطي

دنيا صايرة داقرة عالكل .. وللا شو يا أبو جحفل القوقازي
دنيا صايرة داقرة عالكل .. وللا شو يا أبو جحفل القوقازي

كان الإنسان يتفتل كيف ما بدو بكل سورية .. يعني اذا حب ينزل يشوي لحمة بالغوطة .. يقول للمرة والولاد قومو يابي رايحين سيرانة .. وكان اذا ضربت براسو وهفت نفسو على سمك بنص الليل .. يحمي السيارة ويطلع عاللادقية هو والشباب .. واذا شي حدا من ابعد ضيعة بسورية لعت نفسو شوي يجي يتحكم بالشام .. هللأ اذا الواحد بدو يفوت عالحميدية ياكلو بوري بوظة .. هي اذا معو حقو .. بدو يحسبلو 1000 حساب .. حساب الهاون .. حساب المفخخات .. حساب التعسفي .. حساب العشوائي .. حساب يلاقيلو شي باص بنص هالزحمة مشان ما يتخورف بركبة تكسي الله مولاها .. وحسابات كتير .. هي روحة الحميدية .. كيف اذا حدا عم يدرس بحلب وبدو يطلع عطرطوس .. او حدا ساكن بالشام وبيت حماة بحمص ومرتو نازلة فيه نق .. ومليون قصة وقصة .. بس .. هاد الشعور ما كان يحس فيه غير نحنا المدنيينن يا حسرتي .. اما هللا تغير الوضع .. ابن داعش يلي كانت كلمتو كلمة .. هللا ما بيقدر يتحرك شبر برات مقرو .. وابن النصر يلي كان هو وابن داعش .. تنتين بلباس ما عاد يقدر يعتب على ضيعة محتلتا داعش او العكس .. وجماعة الجبهة الاسلامية يلي ضلو يقولو هالشباب والله اوادم ومافي منن وجايين و"مهاجرين" ليحمونا ويساعدونا .. وما ضل بيت بالضيع المسيطرين عليها اللا انفتحلن .. كل يوم عم ياكلولن شي كمينين تلاتة من داعش وعلقانين علقة ما حدا بيعرف شو آخرتا .. لك الأمير الداعشي يلي كان يتفتل بنص ضيع ادلب وحلب والرقة .. صار اذا بدو يروح يحنن دقنو أو يشتريلو شي كيس شيبس .. بدو يطالع معو دوشكا وشي عشرة مرافقة .. هي اذا ما اجاه شي برميل .. وطالعولو عاجل عالتلفزيون مقتل متزعم جماعة خطيرة شريرة عميلة سئيلة مع 2707 من مرافقيه .. لك آااااخ .. دنيا صايرة داقرة عالكل .. وللا شو يا ابو جحفل القوقازي ؟

اترك تعليق: التعليقات تمثل أصحابها ولا تمثل `هنا سورية` بالضرورة.